काठमाडौं । कृषि, वन तथा पर्यावरण मन्त्री गिता चौधरीले गुरही पर्व थारू समुदायको संस्कृति, परम्परा र प्रकृतिसँगको गहिरो सम्बन्ध झल्काउने मौलिक पर्व भएको बताउनुभयो ।
काठमाडौमा आयोजित गुरही कार्यक्रमलाई सम्बोधन गर्दै गुरही अर्थात् गाइने किराको पूजा गर्ने परम्पराले थारू समुदाय प्रकृतिमा रहेका हरेक जीवप्रति सम्मान र संरक्षणको भावना राख्दै आएको पुष्टि हुने उहाँको भनाइ छ ।
मन्त्री चौधरीले गाइने किरा (Dragonfly) पारिस्थितिक प्रणालीका लागि महत्वपूर्ण लाभदायक जीव भएको उल्लेख गर्दै यसको संरक्षणमा ध्यान दिनुपर्ने बताउनुभयो ।
गाइने किराले मानिसलाई हानि पुर्याउने तथा रोग सार्न सक्ने विभिन्न साना किराहरू नियन्त्रणमा सहयोग गर्ने भएकाले कृषि, स्वास्थ्य र वातावरणीय सन्तुलनमा यसको महत्वपूर्ण भूमिका रहेको उहाँले उल्लेख गर्नुभयो ।
उहाँले भन्नुभयो, “हाम्रो संस्कृतिले प्रकृतिमा रहेका हरेक जीवको सम्मान गर्न सिकाउँछ । गुरही पर्वमा गाइने किराको पूजा गर्ने परम्परा हाम्रो प्रकृतिप्रतिको सम्मान र संरक्षण चेतनाको उत्कृष्ट उदाहरण हो ।”
मन्त्री चौधरीले संस्कृति र परम्परालाई संरक्षण गर्दै त्यससँग जोडिएका प्रकृति तथा जैविक विविधताको संरक्षणलाई समेत अघि बढाउनुपर्नेमा जोड दिनुभयो ।
गुरही पर्वले नयाँ पुस्तालाई आफ्नो मौलिक संस्कृति, प्रकृति संरक्षण र सामाजिक सद्भावबारे ज्ञान तथा चेतना प्रदान गर्ने उहाँको भनाइ छ ।
गुरही पर्व थारू समुदायको मौलिक पहिचानसँग जोडिएको महत्वपूर्ण पर्व भएकाले यसको संरक्षण र प्रवर्द्धनमा सबैले योगदान गर्नुपर्ने मन्त्री चौधरीले बताउनुभयो ।
उहाँले गुरही पर्वले थारू समुदायमा आपसी एकता, सद्भाव र भाइचारा अझ मजबुत बनाउँदै प्रकृति संरक्षणको सन्देश फैलाउन सफल होस् भन्ने शुभकामना व्यक्त गर्नुभएको छ ।
