काठमाडौँ । निर्वाचन आयोगले प्रतिनिधिसभा सदस्य निर्वाचनको मतदानका लागि सम्पूर्ण तयारी पूरा भएको जनाएको छ ।
उम्मेदवार र मतदातालाई सहज बनाउनका लागि आयोगले बैंक तथा वित्तीय संस्थासँग सम्बन्धित शाखालाई नियमित सञ्चालनको आवश्यक व्यवस्था मिलाइएको जनाएको हाे ।
फागुन २१ गतेका दिन हुने प्रतिनिधिसभा सदस्यको आमनिर्वाचनलाई मध्यनजर गरी सरकारले तीन दिन सार्वजनिक बिदा दिएको छ।
संवैधानिक दायित्व अनुसार आयोग स्वच्छ, निष्पक्ष, पारदर्शी तथा विश्वसनीय निर्वाचनको दायित्व पूरा गर्न क्रियाशील छ। संवत २०८२ साल भदाै २३ र २४ गतेको आन्दोलनपछि विशेष परिस्थितिमा घोषणा भएको प्रतिनिधि सभा सदस्य निर्वाचनमा फागुन २१ गते बिहान ७ः ०० बजेदेखि साँझ ५ः ०० बजेसम्म देशभर सम्पन्न हुने मतदानका लागि आवश्यक मतपत्र, मतपेटिका तथा अन्य निर्वाचन सामग्री सबै मतदान केन्द्रमा पठाइसकिएको छ। मतदान केन्द्रहरूको निर्माण, व्यवस्थापन, पहुँच व्यवस्था, लैङ्गिक/अपाङ्गमैत्री व्यवस्था तथा कर्मचारी परिचालन लगायतका सम्पूर्ण कार्यहरू सम्पन्न भइसकेका छन् ।
मतदाताले नियमितरूपमा आफूलाई मन परेको उम्मेदवार र राजनीतिक दललाई मतदान गर्न पाउने गरी शान्ति सुरक्षाको भरपर्दो प्रत्याभूति मिलाइएको छ।
